28 Jul 2020

Die bedryfsliggaam Vinpro, Agri Wes-Kaap, die landbou-belangegroep Saai en Wes-Kaapse wynprodusente het verlede week vergader om die uitwerking van die tweede verbod op alkoholverkope op die wynbedyf te bespreek.

Mnr Jannie Strydom, uitvoerende hoof van Agri Wes-Kaap, sê konstruktiewe gesprekke om die wynbedryf te red en mense se lewensbestaan te beskerm, is krities. Hy sê die verbod hou ‘n potensiële ramp vir ‘n belangrike landbousektor in en dat die belange van primêre produsente en die wynwaardeketting ten alle koste beskerm moet word.

Mnr Francois Rossouw, uitvoerende hoof van Saai, sê familieboere is die mees kwesbare belanghebbendes in die waardeketting wat deur die verbod op verkope van wyn geaffekteer word. Hy sê ‘n verdere blokkade in hulle bemarkingskanale kan ‘n rampspoedige impak hê. “Wyn- en druiweprodusente verteenwoordig sommige van die oudste familieplase in Suid-Afrika,” sê hy.

Mnr Rico Basson, uitvoerende direkteur van Vinpro, sê in die afgelope 14 weke het die bedryf ‘n inkomsteverlies van R4.5 miljard gely. Hy sê werksverliese het reeds as gevolg van Covid-19 regulasies voorgekom, en na raming kan nog 18 000 werksgeleenthede in die slag bly. “Vermenigvuldig 18 000 werkers met vyf afhanklikes elk, dan kyk ons na amper 100 000 mense wat algehele armoede in die gesig staar,” het mnr Basson gesê.